အထွေထွေဗဟုသုတများနှင့် ထူးခြားဆန်းပြားသတင်းများမျှဝေခြင်း

ဤဘလောဂ့်ဆိုဒ်သည် ဆိုင်မွန်စာကြည့်ဆိုဒ်၏ ပရိတ်သတ်များ တက်ရောက် ဖတ်ရှုခြင်း လွယ်ကူမြန်ဆန် စေရန် ရည်ရွယ်၍ ထပ်မံတိုးထားသော ဆိုဒ်ပွား တစ်ခုသာ ဖြစ်ပါသည်။

Thursday, May 26, 2016

ထေရ၀ါဒ ဗုဒ္ဓဘာသာနှင့် စိပ်ပုတီး




( မြတ်စွာဘုရား၌ စိပ်ပုတီး ရှိသလား )

ယခု အခါ မြန်မာ ဗုဒ္ဓဘာသာဝင် အများစုတို့
အသုံးပြုလျက် ရှိကြသော စိပ်ပုတီး-ကား ထေရ၀ါဒ ဗုဒ္ဓဘာသာ တို့၏ ကိုယ်ပိုင် ဘာသာရေး အသုံး အဆောင် ပစ္စည်း မဟုတ်ပါချေ။

အမှန်ဆိုရသော် ထေရ၀ါဒ ဗုဒ္ဓဘာသာ၌ ကျင့်စဉ် တရားများ အနေဖြင့် ဒါနကျင့်စဉ်၊ သီလကျင့်စဉ်၊ သမထ ဘာဝနာ (သမာဓိ) ကျင့်စဉ်၊ ဝိပသနာ ဘာဝနာ (ပညာ) ကျင့်စဉ် ဟူ၍ ကျင့်စဉ်ကြီး လေးရပ်ရှိ၏။ ထိုကျင့်စဉ် များတွင် ဒါန ကျင့်စဉ် သီလ ကျင့်စဉ် တို့၌ စိပ်ပုတီးကို မလိုကြောင်း ထင်ရှား သိသာပါ၏။

သမထ ဘာဝနာကား သမာဓိ အားကောင်းအောင် ထူထောင် ရသော ကျင့်စဉ်ဖြစ်၏။ သမာဓိ အားကောင်းမှ ကျင့်စဉ်၏ အကျိုးဖြစ်သော ဈာန်၊ အဘိညာဉ်တို့ကို ရနိုင်၏။
စိပ်ပုတီးကား ဈာန်၊ အဘိညာဉ် ရလောက်သည့် သမာဓိ၏ အဟန့်အတား အနှောက် အယှက် ဖြစ်၍ သမထ ဘာဝနာ အကျင့်၌လည်း စိပ်ပုတီး အသုံးမ၀င်ချေ။

မဂ်ပေါက် ဖိုလ်ဝင် နိဗ္ဗာန်မြင်နိုင်သော ၀ိပဿနာ ဘာဝနာ အကျင့်ကား ရုပ် နာမ် တရားတို့၏ မမြဲပုံ ဆင်းရဲပုံ အတ္တ မဟုတ်ပုံ တို့ကို အမြဲမပြတ် တရစပ် ရှုမှတ် ပွားများ အားထုတ်ရသော
ပညာ ကျင့်စဉ် ဖြစ်၍ စိပ်ပုတီးသည် ပို၍ အနှောက် အယှက် ဖြစ်သည်။ ထို့ကြောင့် မြတ်စွာဘုရားနှင့် ဘုရားရှင်၏ တပည့် သာဝက တွေမှာ စိပ်ပုတီးရှိကြောင်း၊ စိပ်ပုတီးကို သုံးစွဲလေ့ ရှိကြောင်း ပိဋကတ် သုံးပုံ နိကာယ် ငါးရပ်လုံး၌ အရိပ် အမြွက်မျှ မတွေ့ရခြင်းဖြစ်သည်။ အယုတ်ဆုံး အားဖြင့် ပိဋကတ်၌ စိပ်ပုတီးဟော ပါဠိဝေါဟာရပင် မရှိသည်ကို တွေ့ရ၏။

သို့ဖြစ်၍ သုံးလူ့များထိပ်၊ ငါးမာရ်နှိပ်၊ စိပ်ရန်ပုတီး ရှိလိမ့်နည်း - ဆိုသည့် ကျည်းကန် ကိုရင်ကြီး အမေးကို ရွှေတောင်မြို့ ဇိနတ္ထပကာသနီ ကျမ်းပြု ကျီးသဲလေးထပ် ဆရာတော် ဘုရားကြီးက ပုတီး ရှိကြောင်းကို ကျမ်းဂန်၌ မတွေ့ရ ဘူးချေ။ အကယ်၍ ပုတီး ဆောင်တော် မူသည် ဖြစ်အံ့ ထိုပုတီးကို မည်သည့် ဒါယကာ လှူသည်၊ မည်သို့ သုံးဆောင်တော် မူသည်၊ မည်မျှလောက် အကျိုး ရှိသည်၊ မည်သည့် ရဟန်း အမွေခံ ရသည် - ဟု ကျမ်းဂန် လာရာ၏။ ယင်းသို့ မလာသောကြောင့် ဘုရားမှာ ပုတီး မရှိဟူ၍ သိသင့်သည် - ဟု ဖြေဆို ထားသည်ကို စွယ်စုံကျော်ထင် ကျမ်း၌ တွေ့ရသည်။

(တန္တရ မန္တရဂိုဏ်းတို့၏ အသုံးအဆောင်ပစ္စည်း)

မှန်ပါသည်။ မြတ်စွာဘုရား၏ သာသနာတော်သို့ ၀င်သည့်အခါ သာသနာ့ ၀န်ထမ်း ရှင်ရဟန်းတွေ အသုံးပြုဖို့ သာသနာ့ အသုံးအဆောင် ပစ္စည်းတွေ အဖြစ် ပရိက္ခရာ ရှစ်ပါးကို
ဘုရားရှင် ခွင့်ပြုတော် မူခဲ့၏။ ထို ၈-ပါးမှာ
  1. သပိတ်,
  2. သင်းပိုင်,
  3. ဧကသီ,
  4. ဒုကုဋ်(နှစ်ထပ်သင်္ကန်းကြီး),
  5. ခါးပန်းကြိုး,
  6. သင်တုန်းဓား,
  7. အပ်,
  8. ရေစစ်-တို့ ဖြစ်သည်။

ဤသာသနာ့အသုံးအဆောင်ပစ္စည်း ပရိက္ခရာ ၈-ပါးထဲမှာ စိပ်ပုတီး မပါသည့် အတွက် စိပ်ပုတီးသည် ထေရ၀ါဒ ဗုဒ္ဓဘာသာ၏ ကိုယ်ပိုင် ဘာသာရေး အသုံးအဆောင် ပစ္စည်း တခု မဟုတ်ကြောင်း ထင်ရှား သိသာပေသည်။

အမှန်ဆိုရသော် စိပ်ပုတီးသည် ဟိန္ဒူဗြဟ္မဏ ဘာသာမှ တန္တရ မန္တရ ဂိုဏ်းသားတို့၏ ကိုယ်ပိုင် အသုံးအဆောင် ပစ္စည်းဖြစ်၏။ ဂါထာ မန္တရားတွေကို မန်းမှုတ်၊ ရွတ်ဖတ်၊
သရဇ္ဈာယ်သည့် အခါ အခေါက်ရေကို တိတိကျကျ သိရအောင် သူတို့ စိပ်ပုတီးကို အသုံးပြု ကြခြင်း ဖြစ်သည်။

(စိပ်-ရွတ်ဆိုမန်းမှုတ်သည့်၊ ပုတီး-ပုတီး) မဟာယာနဗုဒ္ဓဘာသာမှာလည်း တန္တရ မန္တရဂိုးဏ်းများ ရှိ၏။

( မြန်မာသာသနာဝင်နှင့် တန္တရ မန္တရဂိုဏ်း )

မြန်မာ သာသနာဝင်ကို ကြည့်လျှင် ပျူတို့၏ သရေခေတ္တရာ တွင်မူ ထေရ၀ါဒက အားကောင်း နေသော်လည်း မဟာယာန ၀ါဒကလည်း ရှိနေပြီ ဖြစ်၏။ ထို့ပြင် ဗိဿနိုး ကိုးကွယ်သည့်
ဗြဟ္မဏ၀ါဒနှင့် ရိုးရာ ကိုးကွယ် ယုံကြည်မှုများ၊ ဗေဒင်နှင့် (ဂါထာ မန္တန် ယုံကြည်မှု များလည်း ရှိခဲ့၏။ ပုဂံခေတ်တွင် အနော်ရထာ မတိုင်မှီ၌ ပျူခေတ်က အားကောင်း ခဲ့သော
ထေရ၀ါဒမှာ မှေးမှိန်ပျောက်ကွယ် သလောက် ဖြစ်နေ၏။

ရှေးအတီတေ၊ ပုဂံပြေတွင်၊ ဆံကေသာ လက်လေးသစ်၊ မုတ်ဆိတ်မွေး ဗရဗျစ်၊ မည်းညစ်သည့် စီဝရံနှင့်၊ တာတေလံ အကျင့်ဆိုးသော၊ ရှင်သိုးတကာ့ ထိပ်ခေါင်ကြီး၊ ရှင်မထီး
တို့ကဲ့သို့-ဟု ဆရာကြီး ဦးပုည ဆိုထား သကဲ့သို့ ပုဂံပြည် သမထီး အရပ်၌ အရည်းကြီး သုံးကျိပ်နှင့် တပည့်ခြောက်သောင်းတို့ သီတင်းသုံး နေထိုင်ကြ၏။ ပုဂံပြည် မင်း အဆက်ဆက်နှင့် ပြည်သူ တို့သည် သူတို့ကို ကိုးကွယ်နေ ကြသည်ဟု မှန်နန်း ရာဇ၀င်တော်ကြီး၌ ဆို၏။

ထိုအရည်းကြီးတို့ ဟောသောတရားမှာ သူ့အသက်ကို သတ်မိသူသည် ဤပရိတ်ကိုရွတ်သော် ကမ္မပထမှ လွတ်၏။ မိဘကို သတ်မိသူသည် ဤပရိတ်ကို ရွတ်သော် ကမ္မပထမှ လွတ်၏။ စသည်ဖြင့် မဟုတ် မတရားသော အဓမ္မကို ဓမ္မဟူ၍ ဟောကြားကြ၏။

အမှန်စင်စစ် ထိုအရည်းကြီး တို့သည် ဗြာဟ္မဏ ၀ါဒနှင့် မဟာယာန တို့မှ ဆက်နွယ် လာသည့် တန္တရ မန္တရ ဂိုဏ်းဝင်များ ဖြစ်ကြသည်။ အနော်ရထာ ဘုရင် လက်ထက်တွင် ရင့်ကျက်သော ပါရမီ ရှိသည့် ဘုရင်ဖြစ်၍ ထိုအရည်းကြီး ကိုးကွယ်မှုကို နှစ်သက်တော် မမူဘဲ တရားမှန်ကို တောင့်တ နေချိန်တွင် သထုံမှ ရှင်အရဟံ ရဟန္တာ မထေရ်မြတ် ပုဂံသို့ ကြွတော် မူလာရာ အယူမှန်ဖြစ်သော ထေရ၀ါဒ ဗုဒ္ဓ သာသနာကို ကိုးကွယ်ခွင့် ရသွား၏။

ထိုအခါ ပုဂံပြည့်ရှင် အနော်ရထာဘုရင်သည် အရည်းကြီးသုံးကျိပ်နှင့် နောက်လိုက်တပည့် ခြောက်သောင်းတို့ကို လူဝတ်လဲစေပြီး ရှင်အရဟံမထေရ်မြတ်၏ ထေရ၀ါဒ ဗုဒ္ဓ သာသနာတော်ကို အားပေး ချီးမြှောက် သဖြင့် ထေရ၀ါဒ ဗုဒ္ဓသာသနာသည် ပုဂံပြည်တွင် နေရောင် လရောင်ပမာ ထွန်းလင်းဖြာခဲ့ပေသည်။

ဤသို့ အနော်ရထာမင်းကြီးလက်ထက်တွင် တန္တရ မန္တရဂိုဏ်းများ ပျောက်ကွယ်သလိုဖြစ်သွားသော်လည်း နောက်မင်းများလက်ထက်တွင် ထိုဂိုဏ်းများနှင့် မဟာယာနဂိုဏ်းတို့ တစတစ ပြန်ပေါ်လာခဲ့၏။ ကျန်စစ်သားမင်းကြီး လက်ထက်၌ ထိုတန္တရ မန္တရ ဂိုဏ်းများအပြင် ဗိဿနိုးနတ် ကိုးကွယ်မှုစသည့် ဗြဟ္မဏအယူဝါဒများ ပြန့်ပွားလာသည်။

ဤသို့အားဖြင့် မြန်မာနိုင်ငံတွင် ထေရ၀ါဒသာသနာသည် ပုဂံခေတ်ဦးပိုင်းမှစ၍ အားကောင်းလာခဲ့သော်လည်း မဟာယာန၊ ဗြာဟ္မဏ၀ါဒ၊ တန္တရ မန္တရ စသော ၀ါဒများမှာ ထေရ၀ါဒ အားနည်းအောင် အင်းဝခေတ် ဟံသာဝတီခေတ်တို့ တိုင်အောင် အစဉ်နှောက်ယှက်လျက် ရှိနေကြပေသည်။

ထို့ကြောင့် ထိုဂိုဏ်းတို့မှ ကိုးကွယ်မှု ဆိုင်ရာနှင့် ဘာသာရေး အသုံးအဆောင် ပစ္စည်း အချို့တို့သည် ထေရ၀ါဒ ဗုဒ္ဓဘာသာထဲသို့ ရောနှော ၀င်ရောက် ခဲ့ကြပေသည်။ ထိုအထဲတွင် စိပ်ပုတီး - ဟူသော ဘာသာရေး အသုံးအဆောင် ပစ္စည်းသည်လည်း တခု အပါအ၀င် ဖြစ်၏။ စိပ်ပုတီးသည် တန္တရ မန္တရ ဂိုဏ်းသုံးဖြစ်၍ ထိုတန္တရ မန္တရဂိုဏ်းများမှ တဆင့်
ထေရ၀ါဒ ဗုဒ္ဓဘာသာသို့ ၀င်ရောက် လာသည်ဟု ယူဆရသည်။

ထိုဂိုဏ်းများသည် အနော်ရထာမင်း မတိုင်မီကပင် ရှိနေပြီဖြစ်၍ စိပ်ပုတီး-သည် မည်သည့်အချိန်တွင် ထေရ၀ါဒ ဗုဒ္ဓဘာသာသို့ ၀င်ရောက်ခဲ့သည်ဟု အတိအကျ ပြောဆိုရန် ခဲယဉ်း၏။

( မိဖုရားစောလုံနှင့် စိပ်ပုတီး )

သို့ရာတွင် စာရေးသူ လက်မှမ်းမှီ သလောက် လေ့လာကြည့်ရာ ပုဂံခေတ်၊ သက္ကရာဇ် (၆၁၇) ခုနှစ်တွင် နန်းတက်သော နရသီဟ ပတေ့မင်း (မင်းခွေးချေး) လက်ထက်တွင် မြန်မာ ဗုဒ္ဓ ဘာသာတို့ စိပ်ပုတီးကို ဘာသာရေး အသုံးအဆောင် အဖြစ် အသုံးပြုနေကြပြီ ဖြစ်ကြောင်း တွေ့ရှိရ၏။

အတန်ငယ်ချဲ့၍ ဆိုဦးအံ့။ ပုဂံပြည် နရသီဟပတေ့ မင်းကား အစားအသောက် ကြူးရုံမက အပျော် အပါးလည်း ကြူး၏။ နွေလရောက်သည့် အခါ ရေဖျန်း ကစားလေ့ရှိ၏။ ထိုအခါတွင် နန်းတော်မှ မြစ်ဆိပ်အထိ အရိပ်ကြီးစွာ ဆောက်လုပ်ပြီးလျှင် လူမမြင်ရအောင် ကာရံပြီးမှ မြစ်ဆိပ်တွင်လည်း မင်းတဲ လုံခြုံစွာဆောက်၍ မိဖုရားမောင်းမမိဿံတို့နှင့် တဲတန်းဥမင်ဖြင့် ကြွတော်မူကာ ရေကစားတော် မူလေ့ရှိ၏။ ရေကစားသည့် နေ့တနေ့တွင် မောင်မငယ် တယောက်အား မိဖုရားစောလုံကို မျက်စိ မျက်နှာ ဦးဆံ တို့ကိုပါ ရွှဲရွှဲစိုအောင် မင်းကြီးက
ရေပက် ခိုင်း၏။

ထိုအခါ မိဖုရားစောလုံသည် ကျီစယ်သည်ကို သည်းမခံနိုင်ဘဲ အရှက်ကြီး ရှက်၍ အမျက်ကြီးကာ ဘုရင်ကြီး အပေါ်တွင် စိတ်အနာကြီး နာသွား ခဲ့သည်။ ထို့ကြောင့် မင်းကြီး၏ စားတော်၌ ဆေးထည့်ပြီး မိဖုရားငယ် ရှင်မောက်အား စောမောက်-ငါ နေမကောင်း၊ ငါ့ကိုယ်စား မင်းကြီးကို စားတော် ဆက်ပါချေ-ဟု စားတော်ဆက်ခိုင်း၏။

မင်းကြီးသည် စားတော်ခေါ်အံ့ဆဲဆဲတွင် အောက်က ခွေးချေ၍ စားတော်မခေါ်သေးဘဲ ခွေးကိုကျွေး၏။ ခွေးလည်း စားသောခဏ၌ သေသွား၏။ မင်းကြီးသည် ရှင်မောက်ကို
မေးစစ်တော်မူရာ မိဖုရားစောလုံက သူနေမကောင်း ဖြစ်နေ၍ သူ့ကိုယ်စား စားတော်ဆက်ပါ-ဟု စေခိုင်း၍ စားတော် ဆက်ရကြောင်း လျှောက်တင်၏။

မင်းကြီးသည် စောလုံကို ခေါ်တော်မူ၍ စစ်မေးတော် မူရာ မိဖုရားစောလုံက ဟဲ့-ပန်းပွတ်သည် မြေး၊ နင့်ကို ငါ လုပ်ကျွေးမွေးမြူ၍ ငါ့ကို နင်သူကောင်းပြုလျှင် ဤသို့ မိဖုရား အဖြစ်ရောက်ပြီးမှ ငါ့အား အများတကာ ရှေ့တွင် တကိုယ်လုံး ရွှဲရွှဲစိုအောင် မောင်းမငယ်ကို ရေနှင့် ပက်ခိုင်းတဲ့ အတွက် နင့်ကို ငါမုန်း၍ သတ်သည်-ဟု မကွယ် မထောင့်
ဖြောင့်ဖြောင့်ပင် သံတော်ဦး တင်လိုက် သတဲ့။

ထိုအခါ မင်းကြီးသည် ပန်းပဲ တထောင်ကို ခေါ်တော်မူ၍ သံကျပ်စင် ပြုလုပ်ကာ မိဖုရားစောလုံကို သံကျပ် တင်လေ-ဟု အမိန့် ချမှတ် လိုက်သည်။ မိဖုရားစောလုံသည် မင်းကြီး၏ အမိန့်ကို သိရှိရသည့် အခါ သူသတ်တို့ကို တံစိုးလက်ဆောင် ရွှေငွေများစွာပေး၍ ခုရက်ကြာအောင် သံကျပ်စင်ကို လုပ်စေသည်။ သံကျပ်စင်လုပ်နေသည့် ခုရက်တွင် နေ့ညပတ်လုံး သီတင်း သီလဆောက်တည်၍ အဘိဓမ္မာတရားတော်ကို နာသည်။ ဣတိပိ သော ဘဂ၀ါ၊ သွက္ခာတော၊ သုပ္ပဋိပန္နော အစရှိသော ရတနာသုံးပါး၏ ဂုဏ်တော် ကျေးဇူးတော် များကို အောက်မေ့လျက် ပုတီးစိပ်သည်။

ခုရက်စေ့၍ သံကျပ်စင်ကြီး ပြီးစီးသည့် အခါ သူသတ်သမား တို့က လျောက်ပတ်ခြေငံသော စကားဖြင့် အရှင်မြောက်သားတော်-အမျက်တော် ကြီးလှသည်၊ လာတော်မူလော့ -ဟု ခေါ်ကြ၏။ ထိုအခါ မိဖုရားစောလုံသည် ရတနာ သုံးပါးဂုဏ်ကို အောက်မေ့လျက် ပုတီးစိပ်ကာ ရဲရဲတောက်လောင်နေသည့် သံကျပ်စင်ထက်သို့ တက်သည်။ မိဖုရားစောလုံ သံကျပ်စင်ပေါ်ရောက်သည်နှင့် တပြိုင်နက် ရဲရဲညီးညီးတောက်လောင်နေသည့် မီးကြီးသည် ရုတ်ချည်းငြိမ်း၍ သွားလေ၏။

ဤကဲ့သို့ ရတနာ သုံပါးတို့၏ ဂုဏ်တော်ကျေးဇူးတော်များကို အာရုံပြုကာ ပုတီးစိပ် ပွားများနေသည့် အတွက် သုံးကြိမ် သုံးခါ မီးများငြိမ်းပြီးသည့်အခါမှ ငါသည် ခဏချင်း ကျွမ်း၍ ပျောက်ပါစေ၊ ငါတောင်းသည့် ဆုအတိုင်း ပြည်ပါစေ-ဟု အဓိဋ္ဌာန် ပြုလိုက်မှ မီးလောင်ကျွမ်းကာ သေဆုံး သွားရသည်ဟု မှန်နန်း ရာဇ၀င်တော်ကြီး၌ လာရှိသည်။

( ရှေးမြန်မာကြီးများနှင့် စိပ်ပုတီး )

ဤမိဖုရားစောလုံ၏ အဖြစ်အပျက်ကိုကြည့်လျှင် စိပ်ပုတီးကို ပုဂံခေတ်ကပင် မြန်မာ ဗုဒ္ဓဘာသာတို့ ဘာသာရေး အသုံးအဆောင် ပစ္စည်းတခု အဖြစ် အသုံးပြုနေကြပြီဖြစ်ကြောင်းနှင့် စိပ်ပုတီးနှင့် ပွားများသော ဗုဒ္ဓါနုဿတိဘာဝနာ စသည်တို့သည် အလွန် အကျိုးရှိ တန်ခိုးရှိကြောင်း တွေ့ရ၏။

ရှေးထေရ၀ါဒဗုဒ္ဓဘာသာ မြန်မာကြီးတို့သည် တန္တရ မန္တရ ဂိုဏ်းတို့နည်းကို အတုယူပြီး မိမိတို့ ကိုးကွယ်သည့် ဘာသာအရ ဘုရားဂုဏ်စသည့် ဂုဏ်တော်များကို ပွားများ ကြသည့်နေရာမှာ ဂုဏ်တော်အရေ အတွက် ကိုလည်း သိရ၊ စိတ်လည်း တည်ငြိမ် သင့်သလောက် တည်ငြိမ်မှုလည်း ရအောင် စိပ်ပုတီးကို အသုံးပြု ခဲ့ကြသည်ဟု ယုံကြည် ရသည်။

နောက်ပိုင်းတွင် ဂုဏ်တော်များကို ပွားများရာ၌သာ မဟုတ်၊ အနိစ္စ ဒုက္ခ အနတ္တ ဟူသော လက္ခဏာယာဉ်သုံးပါးကို ဆင်ခြင်သည့်အခါတို့မှာ စိပ်ပုတီးကို တိုးချဲ့အသုံးပြုခဲ့ကြသည်။

အင်းဝခေတ်ဦးပိုင်းတွင် စစ်ကိုင်းတောင် ပုညရှင်စေတီအနီးတွင် ရေငုံဘုန်းတော်ကြီးခေါ် ဆရာတော်တပါးရှိ၏။ ကျမ်းဂန်တတ်၍ တရားဘာဝနာ စီးဖြန်းနေကာ တနေ့ စာသုံးဝါ ပို့ချအပြီးတွင် စကားပြောမိမည်စိုး၍ ရေငုံနေသောကြောင့် ရေငုံဘုန်းကြီးဟု ခေါ်သည်။

ထိုဘုန်းတော်ကြီးသည် သံဃာ့ပရိသတ်တခု၌ ပုတီးစိပ်မှုနှင့်စပ်၍ သံဃာ့မထေရ်ကြီးများ အချင်းချင်းစကားလက်ဆုံကျနေကြရာ တနေ့လျှင် ပုတီးအပတ် တထောင်ရတယ်၊ တသောင်းရတယ်၊ စသည်ဖြင့် ပြောနေကြသည်ကို ကြားသိရ၍ တို့များ အသက်ရှစ်ဆယ်ကျော်ပါပြီ။ တသက်လုံး စိပ်လာတာ အခုမှ ပုတီး-လေးလုံးပဲ ရသေးတယ်။ ဟု မိန့်တော်မူ သတဲ့။ ဗုဒ္ဓါနုသတိ၊ မေတ္တာ၊ အသုဘနှင့် မရဏာနုဿတိ ခေါ် စတုရာရက္ခ (အစောင့်တရား) လေးပါးကို ပွားများနေကြောင်း ဆိုလိုဟန်ရှိ၏။ ဤသို့ အင်းဝခေတ်၌လည်း စိပ်ပုတီးကို အသုံးပြုလျက် ရှိနေကြပေသည်။

ဂါထာမန္တန်စသည့် လောကီပညာရပ်များ ထွန်းကားခဲ့သည့် ဒုတိယ အင်းဝခေတ်ခေါ် ညောင်ရမ်းခေတ် ၌လည်း ညောင်ရမ်း မင်းတရားကြီးသည် လောကီ ပညာအရာ
ကျော်ကြားတော် မူသော ဗားမဲ့ ဆရာတော်ကြီးကို ကိုးကွယ် သကဲ့သို့ ရမည်းသင်းမင်းကလည်း ရေနဲနတ်စက်ရောင် ဆရာတော်ကို ကိုးကွယ်ခဲ့ကြ၏။

ထိုခေတ်တွင် ဂါထာမန္တန်များ ခေတ်စားနေသည့်အတွက် ဂါထာမန္တန်များကို (၃၇)အုပ် ရွတ်မှု၊ အကြိမ် (၁၀၀၀) ရွတ်ဆိုမှုများ ရှိခဲ့ရာ ထိုရွတ်ဆိုမှုများ၌လည်း အရေအတွက်သိအောင် စိပ်ပုတီးကိုပင် အသုံးပြုခဲ့ကြဟန် ရှိပေသည်။

ကုန်းဘောင်ခေတ်မတိုင်မှီတွင် စိန္တကျော်သူ ပြုစုခဲ့သည့် က၀ိလက္ခဏသတ်ပုံကျမ်း-၌လည်း ပုတီးလည်းစိပ်၊ မာန်ကိုနှိပ်၊ သိပ်သိပ်သည်းသည်းပင်-ဟု စပ်ဆိုခဲ့သည်ကိုလည်းကောင်း၊ ဘိုးတော်မင်းတရား လက်ထက်တွင် တွင်းသင်းမင်းကြီး စပ်ဆိုခဲ့သည့် မဟာဇနကပျို့တွင် ဆယ်စုံကမ္မ၊ ပထမြောက်မြား၊ ဘိညာဉ်ငါးနှင့်၊ ရှစ်ပါးသမာပတ်၊ မလွတ်ရမှု၊ လုလ္လပြု၍၊ ဂရုကတ၊ နေ့ညသိပ်သိပ်၊ ပုတီးစိပ်သို့၊ နှိပ်နှိပ်ကွပ်ကွပ်၊ သတိကြပ်လျက်-ဟု ဆိုခဲ့သည်ကိုလည်းကောင်း ထောက်ဆပါက ထိုညောင်ရမ်းခေတ်၊ ကုန်းဘောင်ခေတ်တို့၌လည်း စိပ်ပုတီးအသုံး တွင်ကျယ်နေကြောင်း သိရှိရပေသည်။

နောက်ပိုင်းတွင် စိပ်ပုတီးသည် ထေရ၀ါဒဗုဒ္ဓဘာသာတို့ အများသုံး လက်စွဲပစ္စည်းအထိ အသုံးတွင်ကျယ်လာခဲ့ပေသည်။ ကျောင်းသို့ ဥပုသ်စောင့်သွားကြသည့်အခါ လူတိုင်းမှာပင် စိပ်ပုတီးပါကြသည်။ အယုတ်ဆုံးအားဖြင့် ရှင်ပြုသည့်အခါ၌ပင် ပရိက္ခရာ ရှစ်ပါးတွင် စိပ်ပုတီးမပါသော်လည်း ဆွမ်း၊ သင်္ကန်း၊ ကျောင်း၊ ဆေးတို့ကို သုံးဆောင်သည့်အခါ ရှင်သာမဏေတို့ ပဋိသင်္ခါ ယောနိသော စသည်ဖြင့် ဆင်ခြင်ရာတွင် စိပ်ပုတီးဖြင့် ဆင်ခြင်ရန် စိပ်ပုတီးကိုပါ သပိတ်ထဲထည့်ပေးကြရ၏။

သာသနာတော်တွင် ထိုပဋိသင်္ခါ ယောနိသော လေးပုဒ်ကို ပုတီးစိပ် ၄-ပုဒ်ဟု သုံးစွဲနေကြသည်အထိ တွင်ကျယ်လျက် ရှိနေပေသည်။ ၀ိပဿနာတရား ပြန့်ပွားလာသော ယခုအချိန်၌မူ စိပ်ပုတီးကိုင်သူ လူကြီးများ လျော့ပါးသွားပြီး လူငယ် လူလတ်ပိုင်းတို့သာ ပုတီးအကိုင်များသည်ကို တွေ့ရပေသည်။

အခြားဘာသာပိုင် စိပ်ပုတီးကို မြန်မာထေရ၀ါဒ ဗုဒ္ဓဘာသာဝင်တို့ သုံးစွဲသင့်၊ မသုံးစွဲသင့်ကို ဝေဖန် စိစစ်သော အားဖြင့် ဤဆောင်းပါးကို နိဂုံးချုပ်ပါမည်။

ရှင်တော်ဗုဒ္ဓသည် ကေသမုတ္တိခေါ် ကာလာမသုတ်၌ မည်သည့် အယူဝါဒ၊ မည်သည့် တရားကို မဆို တဆင့် စကား ကြားရုံမျှဖြင့် ၀ါ-အစဉ် အဆက် ကျင့်သုံး လာကာမျှဖြင့် လက်မခံ လင့်ဦး။ ဒီတရားသည် အကုသိုလ်ဖြစ်သလား၊ အပြစ်ရှိသလား၊ ပညာရှိတို့ ကဲ့ရဲ့ထိုက်သလား၊ ပြုကျင့်လျှင် အစီးအပွားမဲ့၊ ဆင်းရဲဒုက္ခဖြစ်သလား-ဟု စိစစ်ရမည်။

ဒီအတိုင်းဖြစ်လျှင် ဒီတရားကို ပယ်စွန့်ရမည်။ သို့မဟုတ် ဒီတရားသည် ကုသိုလ်ဖြစ်သလား၊ အပြစ်ကင်းသလား၊ ပညာရှိတို့ ချီးကျူးသလား၊ ပြုကျင့်လျှင် ချမ်းသာ စီးပွား ဖြစ်သလား-ဟု စိစစ်ရမည်။ ဒီအတိုင်းဖြစ်လျှင် ဒီတရား အတိုင်း ကျင့်သုံးရမည်ဟု လမ်းညွှန်ဟောကြားထား၏။

( စိပ်ပုတီးကို သုံးစွဲကောင်းသလား )

ထိုလမ်းညွှန်ချက် အတိုင်း စိပ်ပုတီး သုံးစွဲမှုကို စိစစ်လျှင် စိပ်ပုတီး သုံးစွဲခြင်းသည် ကုသိုလ်ဖြစ်သည်။ အပြစ်ကင်းသည်။ ပညာရှိတို့ ချီးကျူးသည်။ ချမ်းသာ စီးပွားဖြစ်သည်။ ထို့ကြောင့် ထေရ၀ါဒ ဗုဒ္ဓဘာသာတို့ စိပ်ပုတီးကို သုံးစွဲ ကောင်းပါသည်။ အကြောင်း အမျိုးမျိုးကြောင့် တရား ရိပ်သာသို့ မ၀င်နိုင်သေး သူများ အဖို့ အိမ်၊ ဓမ္မာရုံ၊ ဘုရားကျောင်း၊ ဥပုသ်ဇရပ် စသည် တို့၌ ဗုဒ္ဓနုဿတိစသော အနုဿတိဘာဝနာ၊ မေတ္တာဘာဝနာ စသည်တို့ကို စိပ်ပုတီးဖြင့် ပွားများ အားထုတ်လျှင် အချိန်ကို အချည်းနှီး ကုန်လွန်စေမည့် အစား
ကုသိုလ် များစွာ ရပါသည်။ စိတ်တည်ကြည်မှု သမာဓိလည်း ရသင့်သလောက် ရပါသည်။

သို့ရာတွင် မိဖုရားစောလုံကို အားကျပြီး စိပ်ပုတီးကိုချည်း စိပ်မနေသင့်ပါ။ ယခုလို ၀ိပဿနာတရားများ ပြန့်ပွားနေချိန်တွင် ပုတီးလွတ်ကာ ၀ိပဿနာစခန်းသို့ တက်လှမ်း သင့်ကြပါသတည်း။

- (ဓမ္မာစရိယ ဦးအေးနိုင်-ဘီ-အေ)

( မြတ်မင်္ဂလာ ၂၀၀၁-ခု စက်တင်ဘာလ )

Originally published at - https://www.facebook.com/youngbuddhistassociation.mm

No comments:

Related Posts

Related Posts Plugin for WordPress, Blogger...