ထိုင်းနိုင်ငံ၊ ကရာဘိ ခရိုင်ထဲမှာ ရွှံ့နွံထဲက နော်ဝေနိုင်ငံသား စုံတွဲကို တံငါသည် တဦးက သူရဲကောင်း ဆန်ဆန် ကယ်တင် ခဲ့တယ်လို့ ဘန်ကောက်ပို့စ် သတင်းမှာ ဖော်ပြ ပါတယ်။
အသက် ၄၄ နှစ် အရွယ် ချက်ယူဘွန် ချန်ဒါဟာ ရွှံ့နွံထဲမှာ နစ်နေတဲ့ အဲဒီ သက်ကြီးရွယ်အို စုံတွဲကို တွေ့ခဲ့ပြီး ရွှံ့နွှံထဲကို ချက်ချင်း ဆင်းဆယ်ယူ ကယ်တင် ခဲ့တာ ဖြစ်ပါတယ်။
အဲဒီလို ကယ်တင်ရာမှာ တံငါသည်ဟာ ပထမတော့ နွံထဲနစ်နေတဲ့ စုံတွဲကို လက်နဲ့ ဆွဲယူ ကယ်တင် ပေမယ့် မရတာနဲ့ သူ့ခန္ဓာ ကိုယ်ကို ရွှံ့နွံပေါ် မှောက်လိုက်ပြီး တဦးချင်းကို တက်စေပြီးမှ ကယ်တင် ခဲ့တာပါ။
အဲဒီလို ကယ်တင် ခဲ့တဲ့ ဗွီဒီယိုဖိုင်ကို အွန်လိုင်းပေါ်မှာ တင်ခဲ့ ပြီးတဲ့နောက် မှာတော့ သူဟာ သူရဲကောင်း တဦးလို ဖြစ်လာပြီး အများက ချီးကျူးနေ ကြပါတယ်။
ချက်ယူဘွန် ချန်ဒါက “အမျိုးသမီးက ကိုယ်ခန္ဓာက မလေးတော့ အလွယ် တကူပြန်တက်နိုင် ပါတယ်။ အမျိုးသားက နည်းနည်း ကိုယ်အလေးချိန် များတော့ ကျနော် ခုထိ ပခုံးတွေ နာနေတယ်။ ကောင်းကောင်း လမ်းမလျှောက် နိုင်သေးဘူး” လို့ပြောပါတယ်။
နောက်ပိုင်းမှာ အဲဒီနော်ဝေနိုင်ငံသား စုံတွဲဟာ ကရာဘီ မြို့ဝန်နဲ့အတူ ချက်ယူဘွန်ချန်ဒါရဲ့ အိမ်ကိုသွားပြီး ကျေးဇူး တင်ကြောင်းနဲ့ ငွေကြေး တချို့ပေးခဲ့ တယ်လို့သတင်းက ဆိုပါတယ်။
ချက်ယူဘွန် ချန်ဒါကတော့ “ကျနော်ဘာမှ ပြန်မရ ချင်ပါဘူး။ ကျနော်သိတာ တခုပဲ ရှိတယ်။ သူတို့စုံတွဲ ဒုက္ခရောက် နေတာကို ကျနော်မြင်တယ်။ တခုတည်းသော စိတ်က သူတို့ကို ကယ်တင်ဖို့ပဲ” လို့ပြောပါတယ်။
DVB by ဒီဗွီဘီ
Original link - http://burmese.dvb.no/archives/117172
| ဒီပို့စ်လေးကို နှစ်သက်တယ်ဆိုရင် | လုပ်နိုင်ပါတယ်။ |
